भक्त शिरोमणि श्री धनाजी महाराज

÷÷÷÷÷÷÷÷÷÷÷÷÷÷÷÷÷÷÷ 
श्रीनारायण प्रथम गुरु तिनके शिष्य श्रीदेवी।
तिनके विष्वकसेनजी शिष्य भये हरिसेव ।।
तिनके श्रीशठकोप मुनि जगत उद्धारण हेतु।
प्रगट भये अवतार ले भवसागर के सेतु ।।
तिनके शिष्य श्रीनाथ मुनि प्रगट भये जग मांहि ।
राम मंत्र उपदेश करि मुक्त किए सब कांहि ।।
भये पुण्डरीकाक्ष पुनि तासु भजन की सींव ।
राम मिश्र तिनके भये मुक्त किए बहु जीव ।।
यामुन मुनि तिनके भये जीवन को गति  दीन्ह ।
पूर्ण मुनि तिनके भये शिष्य भजन रसलीन ।।
श्रीरामानुज तिनके भये सो शेषा अवतार ।
राम मंत्र उपदेश करि किए सकल भवपार ।।
पुनि तिनके गोविंद भे भट्टारक पुनि जान।
तिनके श्री वेदांतिजी सकल गुणन की खान ।।
तिनके श्री कलिजीत भये तिनके कृष्णाचार्य ।
रहस्य अष्टदश प्रकट किए कलि मंह पुनि लोकार्य ।।
तिनके शिष्य शैलेषजी वरबरमुनि पुनि शेष ।
अष्ट गादी थापन कर दीन्हो भल उपदेश ।।
आचारी तिनके भये पुरुषोत्तम यह नाम ।
जो कोऊ शरणागत भये तिनको दियो हरि नाम ।।
देवाचारज शिष्य भये तिनके भजन प्रमान।
शिष्यन को हरि भक्ति दे मुक्त दिए करि दान ।।
हरियाचारज शिष्य भये तिनके सब जग जान ।
भये राघवानंद पुनि तिनके वे थे भजन सुजान ।।
श्री रघुवर अवतार ले भल प्रगटे रामानंद ।
कलिमंह जे मतिमंद अति मुक्त किए नर वृन्द ।।
तिनके शिष्य द्वादश भये द्वादश भानू समान ।
निज विज्ञान प्रकाश करि नाश कियो अज्ञान ।।
प्रथम अनंतानंद भे सुखानंद सुखधाम ।
भये सुरसुरानंद पुनि भावानंद सुनाम ।।
अरू नरहरियानंद पुनि सैन भक्त रैदासु।
पीपा भये कबीर पुनि धना नाम है जासु ।।
रानी भयी पदमावती भइ सुरसरि इक वाम ।
स्वामी रामानंद के शिष्यन के ये नाम ।।
करि विचार तिन बांधियो राम भजन दृढ सेतु ।
भवसागर दुस्तर अगम जीव उधारन हेतु ।।        ••••••••••••••••••••○•••••••••••••••••••••••